Die begrafnis van Emily Hobhouse word so na as moontlik aan die Nasionale Vrouemonument in Bloemfontein herskep. Selfs as jy nie lief is vir geskiedenis nie, sal dié ervaring aangrypend wees.

Die byna 650 mense in die stoet sal onder orkesbegeleiding die 600 m in Monumentweg te voet aflê, waarná die begrafnis herleef sal word, met 200 meisies in wit rokkies, vroue in swart, studente, “Jan Smuts”, die dominee, duiwe, ’n koor, berede kommando en treursaluut. Gaste sit gemaklik en hoef nie soos destyds langs die pad te staan nie. Geniet die dag verder met uitstallings, gedenkwaardighede te koop en lekker kos.

Belangrik: Sitplekke moet teen 10h30 ingeneem wees vir die regstreekse TV-uitsending. Onthou om ’n hoed te bring.

Deon Opperman neem die eeuviering verhoog toe. Die kampe, die briewe, die vreeslose vrou wat ten spyte van die wind van voor aanhou skryf het. En die begrafnis wat Suid-Afrika nooit sal vergeet nie.

Met Nico Scheepers (regie), Janine Neethling (musiek), Kate Normington (as Emily Hobhouse), David Minnaar (as Lord Milner), Greg Viljoen (as Lord Kitchener) en Daneel van der Walt (verteller).